СВЯТИТЕЛЬ ДИОНИСИЙ, архиепископ Суздальский

Служба иже во святых отца нашего Дионисия, архиепископа Суздальскаго

НА ВЕЛИЦЕЙ ВЕЧЕРНИ

Поем: Блажен муж: 1-й антифон.

На Господи, воззвах: стихиры на 8, глас 5.

Подобен: Радуйся:

Радуйся, Киево-Печерское воспитание,/ собеседниче и спостниче преподобному Сергию./ Радуйся, Нижегородския земли подвижниче,/ преподобных Евфимия и Макария наставниче./ Радуйся, Вознесенския обители начальниче/ и Суздальския земли архипастырю./ Радуйся, о всей земли Российстей за нас теплый молитвенниче/ и пред Богом надежный заступниче,/ радуйся, святителю отче Дионисие.

Радуйся, Киево-Печерския Лавры отрасль духовная,/ смирением, терпением и постом всех удививый./ Радуйся, на брегах Волги обитель чудную основавый/ и храм Вознесения Господня устроивый,/ радуйся, множество иноков собравый/ и начальником от Христа над ними поставленный,/ радуйся, дванадесять иноков на проповедь Евангелия пославый/ и во страны и грады верхние направивый./ Радуйся, святителю отче Дионисие.

Радуйся, святителю отче Дионисие,/ Суздальския страны хранителю,/ радуйся, молящимся крепкое упование/ и христианом мудрый учителю./ Радуйся, Православия ревнителю/ и благочестия хранителю,/ радуйся, ереси стригольников обличителю/ и неустанный в трудах святителю./ Радуйся всем нам заступниче необоримый/ и пред Богом теплый предстателю.

Радуйся, Церкве Православныя светлое украшение/ и Христовых заповедей известный хранителю,/ радуйся, земнаго отечества нашего светлое радование/ и заблуждших к свету богопознания путеводителю./ Радуйся, монахов предивный наставниче/ и мирских человек теплый заступниче./ Радуйся, Суздальскаго удела украшение/ и Нижегородскаго края удобрение./ Радуйся, яко Российския земли светозарное светило явился еси/ и храм Духа Всесвятаго обрелся еси,/ радуйся, предивный иерарше Дионисие.

Радуйся, во епископа Нижняго Новаграда поставленный,/ осиянием добродетелей христианских всеукрашенный,/ радуйся, от ереси стригольников защитниче мужественный/ Церкве и всея земли Российския явивыйся./ Радуйся, иже Божественною ревностию распалаемый,/ разорил еси тьму еретического нечестия./ Радуйся, мудростию словес твоих князя мужески обличивый,/ православныя законы утверждая./ Радуйся, в Константине граде всех своими добродетельми удививый/ и за ревность велию о Господе / митрополитом русския земли поставленный,/ святителю отче наш Дионисие,/ ты же молися о спасении душ наших.

Слава, глас 6:Великия Киево-Печерския Лавры отрасль духовная был еси,/ на реку Волгу с иконой Божией Матери пришел еси/ и на ея брегах, близь Нижняго Новаграда, чудную обитель устроил еси;/ постом, молитвою, слезами весь край сей освятивый/ и множество иноков в ней собравый./ Духовно возрастивый и во ангельский образ посвятивый/ Евфимия преподобнаго и Макария досточуднаго,/ с ними же молися, святителю отче Дионисие,/ даровати нам велию милость.

И ныне, Богородичен: Кто Тебе не ублажит:

Вход. Прокимен дне. Чтения три. Притчей чтение (главы 3 и 8);

Притчей чтение (главы 10 и 11); Премудрости Соломони чтение (глава 4).

На стиховне стихиры, глас 1.

Подобен: Небесных чинов: Предивный иерарше Дионисие,/ житием со Христом соединился еси,/ чресла любовию препоясавши,/ смиренных путь познавши,/ светильник веры украсивши/ елеем милосердия и милости./ Тем с мудрыми вшел еси в Небесный Чертог,/ идеже предстоя Владыце Христу,/ молися, да услышим вопль, призывающий в полунощи,/ и вси изыдем готови в сретение Ему.

Стих: Священницы Твои облекутся в правду,/ и преподобнии Твои возрадуются.

В мале был еси верен, преблаженне Дионисие,/ над многими тя постави Господь,/ темже и прославился еси / добродетельнаго жития образом,/ Того законоположениям последуя,/ яко истинный делатель винограда Христова явился еси/ и возшел еси в радость Господа твоего,/ Ему же ныне предстоя, молишися о душах наших.

Стих: Блажен муж, бояйся Господа,/ в заповедех Его восхощет зело.

Ревнителю благочестия,/ изрядный делателю винограда Христова,/ Священных Писаний совершенный познателю,/ преданиям прилежный исполнителю,/ ихже приял еси от Христа Бога/ и святых Его апостолов,/ Темже явился светильник Церкве, святителю Дионисие,/ не престай моляся о всех, к твоей помощи прибегающих.

Слава, глас 6:Мирский мятеж оставивши/ и вземши крест, последовал еси Христу,/ преподобных Антония и Феодосия ученик добродетельный явился еси,/ Бога возлюбивый всем сердцем,/ тесным путем шествовал еси,/ любовию Христовою утверждаяся,/ и ныне на свое стадо с Небесе взирающи,/ молися Господеви помиловатися душам нашим.

И ныне, Богородичен: Творец и Избавитель:

Тропарь, глас 8: Православия ревнителю,/ благочестия наставниче,/ ищущим спасения добрый кормчий,/ монашествующих Богодухновенное украшение,/ Богоноснаго Евфимия собеседниче, святителю Дионисие,/ ученьми и добродетельми отечество твое просветил еси,/ не забуди нас, чтущих тя,/ но в мире управи живот наш.

НА УТРЕНИ

На Бог Господь: тропарь святаго, дважды. Слава, и ныне, Богородичен.

По 1-й стихологии седален, глас 8: Равноангельно во обители Печерстей пожил еси,/ преподобных отцев Антония и Феодосия житию последовав,/ и обитель яко град, на горах поволжских основал еси,/ в нейже множество иноков собрав,/ образ им для подражания явился еси./ Ныне же предстоя Престолу Владыки всех, преподобне Дионисие,/ испроси мир мирови, стране Российстей утверждение/ и спасение душам нашим.

Слава, и ныне, Богородичен: Дево Всенепорочная, Пресущественнаго Бога рождшая человеком,/ со преподобным Того непрестанно моли о нас,/ согрешений оставление и жития исправление нам прежде конца даровати,/ верою поющим Тя по долгу, Едина Всепетая.

По 2-й стихологии седален, глас 4:На земли, яко Ангел, с плотию пожил еси,/ святителю Христов Дионисие,/ добродетельным житием украсився,/ молитвою с Богом соединився,/ бдением от напастей врага сохранився,/ трудами милосердия весь освятився и над страстьми воцарився,/ темже пришедше ко Владыке Христу,/ моли верно чтущим тя грехов оставление даровати/ и велию милость подати.

Слава, и ныне, Богородичен: Божественная была еси сень Слова, Едина Пречистая Дево,/ чистотою Ангелы превосходящая,/ мене, паче всех персть бывшаго, осквернена плотскими прегрешении,/ очисти Твоими молитвами,/ Божественными водами омывающи и подающи, Чистая, велию милость.

По полеилеи седален, глас 1: Яко звездка днесь пресветла, святителю отче Дионисие, от Киева Великаго возсиял еси/ и Церковь Божию своими добродетелями украсил еси,/ сердца просвещающи всех к твоему заступлению притекающих;/ души верою и любоию тя песнословящих никогда в своих молитвах не оставляеши;/ страстей и козней диавольских свобождаеши всех чествующих святую память твою. Слава, и ныне, Богородичен: Яко всем скорбящим истинное утешение/ и заблуждшим от истиннаго пути правое наставление/ предстани скоро нам, Пречистая Богородительница,/ и люте обидимых от напастей избави./ Вся бо можеши, елико хощеши/, имущи дерзновение к Сыну Своему и Богу./ Егоже умоли Матерними Своими молитвами,/ согрешением прощение даровати/ благочестномудренно почитающим Рождество Твое.

Таже степенна, 1-й антифон 4-го гласа.

Прокимен: Честна пред Господем,/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Иоанна, зачало 35, от полу.

По 50-м псалме стихира, глас 6: Приидите, множество людей благочествых/ днесь богомудраго святителя Дионисия песньми и пении восхвалим/ и честную его икону любезно облобызаим, глаголюще:/ радуйся, преславный святителю Дионисие, отче наш,/ граду Суздалю и Нижегородской земле хранителю,/ радуйся, яко благочестия столп и поборник истины в земли Российстей явился еси;/ радуйся, яко Святей Троице предстоиши со Ангелы,/ Юже моли непрестанно/ даровати душам нашим велию милость.

Канон Богородице со ирмосом на 6, таже святителя, на 8, глас 8

Песнь 1

Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Отверзи ми устне благодатию Твоею, Христе,/ мрак души моея отгнав, и озари ум мой, молюся,/ яко да возмогу чистым сердцем пети Твоего угодника, преподобного Дионисия.

Приидите, вернии чада, днесь,/ церковнаго светильника и столпа непоколебима,/ Православия учителя и благочестия ревнителя,/ истины проповедника и нечестия искоренителя,/ блаженного Дионисия песньми доброхвальными воспоим.

Киево-Печерския Лавры отрасль духоносная был еси,/ смирением, терпением и постом велию милость у Бога стяжал еси,/ тако испроси и нам у Владыки Христа/ терпение, смирение и душам нашим надежду о спасении.

Богатыя и светоносныя благодати исполнен,/ в обители Печерстей иночествовал еси/ и тамо, яко безплотен, к добродетелем приведе свой ум,/ отче чудне Дионисие.

Богородичен: Яко Истинный Свет от ложесн Своих явившая миру,/ нас во тме страстей ходящих просвети и настави на путь,/ Путь порождшая роду христианскому,/ Марие Богоневесто.

Песнь 3

Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.

Отечество духовное твое, Киев, оставил еси,/ и Нижняго Новаграда вскоре дошед,/ в нем чудную обитель создал еси/ и собрал множество иноков, царский путь спасения им показуя,/ тако и нас не забуди, и управи к небесным обителям, чтущих святую память твою.

Новую Печерскую обитель на крутых брегах Волги устроил еси,/ из неяже всю нижегородскую землю/ подвигами поста, молитвы и обильныя милостыни украсил еси./ Дионисие, отче священнейший,/ молися Христу Богу о спасении душ наших.

Начальником от Христа в обители Печерстей поставлен был еси,/ собеседник и спостник преподобному Сергию явился еси./ С ним же у Христа Бога испроси нам здравие и спасение,/ и душам нашим велию милость.

Времена и лета достопамятных деяний описати,/ труды и подвиги простаго люда писанию предати/ ты, отче Дионисие, иноку Лаврентию благословил еси,/ тем на рать духовную народ собрати,/ страну и веру нашу от безбожных и чужеверных нахождений сохранити.

Богородичен: Солнце Правды, Истинный Бог наш, плоть приял от Тебе, миру возсиял есть, Марие Дево,/ и тля многобожия погибе до конца./ Светом Сына Твоего, Дево Марие, унынием мя омраченного просвети/ и настави на путь спасения.

Седален, глас 8:Из Лавры Киево-Печерския пришед,/ иконою Пресвятыя Богородицы весь край Нижегородский освятил еси./ Обитель Вознесенскую на горах Волги устроивый/ и в ней подвигами просиявый,/ оттудуже на Суздальскую кафедру поставлен был еси./ Святителю премудре Дионисие,/ моли Христа Бога,/ грехов оставление даровати/ почитающим любовию всечестную память твою.

Слава, и ныне, Богородичен, глас 3: Не от Ангел, не от человек,/ но от Сына Твоего, Владычице, Творца Ангелов и человеков,/ кроткаго и смиреннаго сердцем Иисуса,/ смирению удобь навыкнути могу и не прилежу:/ увы мне! Горд сый, презорлив и непокорив присно от нерадения моего явлюся./ Тя убо, о Дево Пренепорочная, молю сокрушенно с теплыми слезами,/ еже дух кротости и смирения сердцу моему даровати,/ да вкусит покой сладчайший душа моя.

Песнь 4

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Икону Богоматери Одигитрии во освящение,/ покров и ограждение земли Русстей из Царяграда принесл еси./ И та источник исцелений и чудотворений всем с верою к ней притекающим показует и от всяких напастей щит державен являет./ Ты же, святителю, непрестанно молися, да покрыет Дева Пречистая Своим омофором всех, к Ней притекающих.

Во епископа Нижняго Новаграда поставленный/ и сиянием добродетелей христианских всеукрашенный,/ мужественный защитник Церкве и земли Российския от ереси стригольников явился еси,/ святителю отче наш Дионисие,/ молися Христу Богу спастися душам нашим.

Тако просветися житие твое пред человеки,/ яко видевше добродетели твоя, отче,/ избраша тя на престол архиерейский града Суздаля,/ емуже дивный архипастырь был еси,/ Пастыреначальнику приводя своя овцы, Иисусу Человеколюбцу.

Помыслив злая, агарянин злочестивый, стрелу лукавую пустив,/ тебе, святителю, сгубити восхотев и веру русскую попрати,/ но ты, Богом сохраняемый и Материею Его Пречистой,/ цел и невредим пребыл еси.

Богородичен: Поющих Ти, радуйся, избавльшая варварскаго служения, изми ны работы чуждаго/ и, сокрушив в мыслех идолострастие, насади благоразумие страха Божия./ Ты бо еси всему благу Вина, Начаток и Исполнение.

Песнь 5

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче.

Храм Духа Всесвятаго явился еси,/ предивный иерарше, отче наш Дионисие,/ Нижний Новаград непрестанными молитвами и священнодействием твоим облагоухал еси./ Темже и ныне ходатайством твоим, святе,/ душевныя и телесныя болезни наша исцели/ и всепрощение грехов нам у Бога испроси.

Благочестия столп непоколебимый явился еси,/ святителю отче наш Дионисие,/ светом добродетелей твоих осиявый Суздальский удел./ Ныне же в селениих праведных водворяяся,/ молися о нас ко Господу, да спасет души наша.

Яко велико облистал еси солнце, от славнаго Суздаля/ зарею словес твоих и чудес сияние испущая во всю Русскую землю,/ Дионисие отче, святителю Божий,/ и вся освящая, благочестно тя ублажающия.

Пастырь воистину добрый словесному стаду твоему, святителю Дионисие, был еси,/ душу свою за овцы своя положити готовый./ Темже и явился еси обидимым заступник непреоборимый, правды же ревнитель неустрашимый,/ сильных мира сего с любовию обличая и пасомых своих отечески вразумляя,/ заблудшия же на путь правый, премудре, наставляя.

Богородичен: Вси роди блажат Тя, Марие Царице,/ и мы песньми блажаще, изображенному на иконе лицу Твоему покланяемся,/ праздник светел во памяти святителя Твоего празднующе.

Песнь 6

Ирмос: Молитву пролию ко Господу/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.

Восхвалим вси великаго святителя Дионисия,/ почтим заступника и утверждение земли Российстей и края Суздальскаго хранителя,/ ереси стригольников ревностнаго искоренителя,/ худаго намерения княжеского непреклоннаго обличителя/ и тако возопиим:/ несть свят, якоже Бог наш,/ и несть праведен паче Тебе, Господи.

Во град первопрестольный на собор призван был еси,/ един от всех епископов княжескому повелению противоста,/ честь Митрополии Московския оберегая,/ противу ставленика князя восстая,/ злощастному Митяю на кафедру первосвятительскую взыти возбраняя,/ ныне же молися о нас ко Господу, помиловатися душам нашим.

Ты неправо ходящим противостал еси, преподобне,/ никакоже соизволяя без благословения Вселенскаго Константина града Патриарха произвести на престол митрополита/ и нечестно дати волка в пастыря овцам, благочестно Христа славящим.

Сугубым рвением о благочестии распалаемь,/ спешно прибыл еси в Царьград,/ пред Патриархом Нилом намерение архимандрита Михаила обличая/ и Русь от ереси стригольников оберегая./ Темже мы твое рачение о Православии воспеваем,/ славя Господа во веки.

Богородичен: Свирепеющия во мне страсти укроти/ и ярем смирения возложи на мя, Богородице,/ да под игом его поработаю прочее время/ и обрящу милость в День Судный.

Кондак, глас 8:Звезду Российскую, от Киева возсиявшую,/ чрез Нижний Новград в Суждаль достигшую/ и всю страну сию учением озарившую,/ ублажим Богомудраго Дионисия,/ той бо молится Господу/ спастися душам нашим.

Икос: Обитель Духа Святаго ты, святителю отче Дионисие, показася,/ в трудах, слезах, молитве и посте/ ради Бога подвизася, Ему Единому служа./ Тебя за ревность ко благочестию Господь на кафедру избра,/ постави Суздальския земли архипастырем,/ мы же тебе велегласно тако возопиим: Радуйся, Киево-Печерское воспитание, собеседниче и спостниче преподобному Сергию./ Радуйся на брегах Волги обитель честную основавый и в ней храм Вознесения Господня устроивый./ Радуйся, множество иноков в обители сей собравый,/ над ними начальником от Христа поставленный./ Радуйся, монашескаго жития светлый образе, преподобных Евфимия и Макария наставниче./ Радуйся, от ереси стригольников Церкви и всея земли Российския крепкий защитниче./ Радуйся, в Константине граде всех своими добродетельми удививый/ и за ревность велию о Господе, митрополитом русския земли поставленный./ Радуйся, святителю отче наш Дионисие, земли Российстей пресветлое украшение.

Песнь 7

Ирмос: От Иудеи дошедше отроцы,/ в Вавилоне иногда/ верою Троическою пламень пещный попраша, поюще:/ отцев Боже, благословен еси.

Крепостью Господней измлада укрепляемый,/ в ограде преподобных Киево-Печерских отцев пребывал еси,/ в посте, слезах, молитве свой иноческий путь провождал еси;/ на брег реки Волги с иконою Божией Матери/ Благодатию Духа Святаго направляемый/ обитель чудную основал еси./ Не забуди нас, верою и любовию чтущих тя, преподобне.

Слава святителем и верным людем заступник воистину был еси,/ стране нашей ныне на враги испроси победы и одоление/ и во благочестии утверди ны непоколебимы,/ отче досточудне Дионисие.

Чистое житие свое скончал еси,/ Чистыя Девы Богородицы воистинну служитель был еси/ и святитель Богови истинен,/ ревнитель Православия и священныя веры,/ и стена людем избранным, Богоблаженне Дионисие.

В пещи искушений и в пламени страстей/ егда тебе неопалившагося виде Вселенский Константина града Патриарх,/ ублажи мужество твое и ревность о Православии/ и почти тя саном архиепископским./ Тако и мы, чтуще память твою, превозносим Господа во веки.

Богородичен: Скорая в бедах Помощнице,/ готовое обуреваемым Пристанище,/ сохрани мя, Мати Божия, от потопления житейскаго/ и не даждь ми разбитися о камень пагубы душевныя.

Песнь 8

Ирмос: Царя Небеснаго,/ Егоже поют вои Ангельстии,/ хвалите и превозносите во вся веки.

Празднует Церковь твое преставление и благознаменитый день твоего успения:/ житие бо на земли благочестно пожив, преславне,/ плод сторичествующий Владыце твоему принесл еси/ и от Него сподобился еси славы неизреченныя,/ непрестанно вопия:/ благословен Бог отец наших.

Крепкаго подвижника огнь страстей не опали,/ но Божественная благодать ороси/ и светла житием показа, зовуща:/ благословен Бог отец наших.

Не на песце суеты мирския,/ но на камени веры основание положив, блаженне,/ в честь Вознесения Господня обитель создал еси/ и духовныя твоя чада звати научил еси:/ благословен Бог отец наших.

Послушанием и милосердием, постом же и молитвою Богу благоугодил еси:/ сего ради прослави тя пред Ангелы и человеки/ благословенный Бог отец наших.

Богородичен: Многое веселие творю злыми делы бесом и радость, хранителю же моему печаль отовсюду./ О Чистая Марие, Мати Христа Бога, настави мя на покаяние,/ да будет онем плач, Ангелу же моему радость, и мне с ним во веки.

Песнь 9

Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с Бесплотными лики Тя величающе.

Благославного града Суздаля архипастырю благоговейнейший явился еси,/ в Цареграде Патриархом Нилом на Митрополию Российскую поставлен был еси./ Не престай моляся о пастве твоей,/ память твою, достохвальне, совершающей.

В Константине граде на Митрополию Российскую поставлен быв,/ великаго града Киева вскоре достигл еси,/ от князя тамо заточение смиренно прияв,/ в темнице святую душу свою честно Господеви предал еси/ и в пещере великаго Антония погребен был еси./ Ныне же молися со преподобными о нас ко Господу,/ спастися душам нашим.

Святителю Божий, угодниче Христов, Дионисие,/ милости неистощимое сокровище, река милосердия воистину,/ призри на немощи моя и исцели душу,/ страстьми зле обуреваемую,/ уврачуй и тело мое, немощьми обложенное,/ да прославлю в тебе благодать и милосердие Христа Бога нашего.

Приими хвалу от раб твоих недостойных, святителю отче Дионисие,/ не презри приносимое тебе благохваление/ и молитву о нас ко Всеблагому Богу сотвори,/ любовию со благоговением почитающих святую память твою.

Богородичен: Вся тварь песнословит Тя, Дево,/ яко прошедшую вся Небесная врата и ставшую Огнезрачнаго одесную Престола./ Одесную стати и нас сподоби Сына Твоего,/ яко песньми Рождшагося из Тебе и Тя величаем.

Светилен, глас 1:Ученьми твоими и делы Церковь Христову украсил еси, святителю отче Дионисие,/ отонудуже в мире просия твое добродетельное житие:/ в молитвах, и пощениих, и бдениих образ учеником был еси./ Темже вопием:/ слава Давшему ти крепость,/ слава Венчавшему тя,/ слава Дарующему Тобою всем исцеление.

Слава, и ныне, Богородичен:Царя веков, Царице Сущая и Мати,/ умоли над страстьми царей показати певцы Твоя:/ се бо приводим Ти в молитву чуднаго Дионисия, угодника Твоего,/ в егоже памяти покланяющеся Тебе величаем.

На хвалитех стихиры на 4, глас 8:Что тя наречем, Богоблаженне Дионисие?/ Божественных преданий учителя,/ служителя таин и делателя винограда Христова,/ свещу, Церковь озаряющую,/ зарю, мрак страстей разгоняющую./ Российстей земли звезду пресветлую,/ Суздальскаго края светозарное светило./ Многа ти имена и больша дарования,/ темже моли спастися душам нашим.

Восхвалим тя, преблаженне Дионисие,/ Троицы чистое жилище,/ Христу подражателю неустанный,/ пролитие дарований духовных,/ безстрастия красный сосуде и чудес источниче неиссякаемый,/ демонов прогонителю неустрашимый/ и страстей целителю преизрядный,/ монашествующих столпе непоколебимый,/ в трудех святителю неусыпный/ и к Богу молитвенниче непостыдный./ Ныне, предстоя Престолу Владыки всех,/ испроси стране нашей утверждение/ и спасение душам нашим.

Труды, пощением и бдением умерщвляя тело твое/, непрестанными молитвами к Богу всегда вопиял еси,/ Святому Духу прекрасная обитель явился еси,/ Иже видя твое благое произволение,/ архипастырем края Нижегородского и земли Суздальския постави тя./ Ты же Церковь добротами украсил еси,/ люди твоя просветил еси./ Сего ради тя почитаем, святителю Богомудре Дионисие,/ моли о творящих святую память твою.

Слава, глас 2: Киими псалмами и пениями/ ублажим Богомудраго Дионисия?/ Евангельскаго учения рачителя/ и страстем Христовым подражателя,/ святителем украшение, иноком утверждение,/ печальным утешение, отчаянным заступника,/ похвалу и радование земли нашея./ Моли за ны Христа Бога, преблаженне Дионисие,/ да не посечет ны, яко безплодную смоковницу,/ но да вселит ны, идеже свет лица Его.

И ныне, Богородичен, глас 2: Спаси от бед рабы твоя, Богородице Дево,/ яко вси по Бозе к Тебе прибегаем,/ яко к нерушимей стене и предстательству.

Славословие великое. И отпуст.

НА ЛИТУРГИИ

Блаженны от канона, песни 3-я и 6-я. Прокимен: Уста моя возглаголют премудрость,/ и поучение сердца моего разум. Стих: Услышите сия, вси языцы: Апостол ко Евреем, зачало 335. Аллилуия, глас 2: Уста праведнаго поучатся премудрости: Стих: Закон Бога его в сердце его: Евангелие от Луки, зачало 24. Причастен: В память вечную будет праведник: