СВЯТИТЕЛЬ ДИОНИСИЙ, архиепископ Суздальский

КОНДАК 1

Возбранный чудотворче и предивный иерарше, великий угодниче Христов, святителю отче Дионисие, граду и стране нашей источаяй щедроты и милости, восхваляем тя с любовию, чада твоя, ты же, яко имея дерзновение ко Господу, от всяких нас бед свободи, да зовем ти: Радуйся, святителю отче Дионисие, земли Российския пресветлое украшение.

ИКОС 1

Ангелов Творец и всея твари Создатель яви тя Церкви Своей святителя и учителя и заступника Руси Святой, имущего к Нему дерзновение молитися об избавлении нас от всяких зол, бед и скорбей. Мы же вернии научишася пети тебе сице:
Радуйся, сыновней любовью ко Господу сердце исполнивый;
Радуйся, совершенну любовь ко Христу показавый.
Радуйся, талант от Бога ти данный в земле не сокрывый;
Радуйся, на спасение душ людских его источивый.
Радуйся, на небесех духовными очима выну Господа созерцавый;
Радуйся, крест на рамена взявый и Христу последовавый.
Радуйся, мзду на небесех от Бога восприявый;
Радуйся, молитвы и пения к тебе взывающих не презревый.
Радуйся, святителю отче Дионисие, земли Российстей пресветлое украшение.

КОНДАК 2

Видяще, яко дана тебе бысть от Господа, преподобне отче наш Дионисие, благодать подавати и скорое вспоможение, и утешение всем, с верою к тебе приходящим, имамы бо таковаго милостиваго и скораго помощника, прославляем всесильнаго Бога поя Ему: Аллилуия!

ИКОС 2

Разум богомудрый стяжав, и усмотрев суету мира сего, преподобне отче Дионисие, помышляя о небесном, и жития постнического ища, потщался еси тесным и прискорбным путем течение жизни сея совершити, мы же любовию побеждаеми, вопием тебе сице:
Радуйся, винограда Христова неувядаемая розго;
Радуйся, цветов смирения прекрасное село.
Радуйся, монашествующих предивное похвало;
Радуйся, постников путеводительная звездо.
Радуйся, иноков пресветлая красото;
Радуйся, веры благочестивыя правило.
Радуйся, святителей преславная высото.
Радуйся, елея премудрости неугасимая лампадо;
Радуйся, святителю отче Дионисие, земли Российския пресветлое украшение.

КОНДАК 3

Смирением и постом, и непрестанною молитвою на страсти плотския крепко ополчився, святителю Дионисие, плоть твою духови поработил еси, и сего ради ныне предстоиши с лики Ангел Престолу Пресвятыя Троицы, выну поя: Аллилуия!

ИКОС 3

В пустыни, в нюже вселился еси, преподобне отче Дионисие, обитель устроися Божиим произволением, в нейже в преподобии и правде денно и нощно Богу работал еси. Мы же, прославляюще Господа Бога, вопием ти:
Радуйся, на брегах Волги обитель чудную основавый;
Радуйся, множество иноков в ней собравый.
Радуйся, преподобных Евфимия и Макария духовно возрастивый;
Радуйся, образ монашескаго жития им показавый.
Радуйся, дванадесять иноков на проповедь Евангелия пославый;
Радуйся, во страны и грады верхние их направивый.
Радуйся, княгиню Василису во ангельский образ посвятивый;
Радуйся, уставу иноческаго общежития ея наставивый.
Радуйся, святителю отче Дионисие, земли Российския пресветлое украшение.

КОНДАК 4

Боготечная звезда всея страны явился еси, преподобне отче Дионисие, всем быв образ словом, житием, любовию, тихостию, кротостию и смирением, темже и мы, видяще добродетели твоя, воспеваем Богу. Аллилуия!

ИКОС 4

Возсия в тебе обильно благодать Божия, святителю отче Дионисие, яви тя светильника земли Российския: пребывая игуменом обители Печерския, о словесных овцах твоих, тебе Богом врученных, денно и нощно имел еси попечение. Мы же взирающе на преподобническия труды твоя, вопием ти:
Радуйся, древних отцев неленостный подражателю;
Радуйся, печальми обуреваемых смиренный утешителю.
Радуйся, скорбящих скорый услышателю;
Радуйся, ран сердечных милостивый целителю.
Радуйся, благочиния монастырского премудрый устроителю.
Радуйся, братии сострадательный и терпеливый учителю;
Радуйся, строптивых и нерадивых строгий обличителю;
Радуйся, кающихся пред Богом добрый предстателю.
Радуйся, святителю отче Дионисие, земли Российския пресветлое украшение.

КОНДАК 5

Видя тя воистинну, отче Дионисие, подвижника крепкаго и молитвенника неусыпнаго, святитель Алексий почти тя саном епископским, граду Суздалю и Нижнему Новограду архипастыря постави, мы же мысленно взирающе на досточудныя твоя подвиги и труды, избравшему тя Богу вопием: Аллилуия!

ИКОС 5

Видя Человеколюбец Господь твое добродетельное житие, да не сокрыт будет светильльник под спудом, но да светит всем верху горы, да прославят Отца Небесного вси человецы, изведе тя из обители пустынныя и постави тя во епископа Нижегородскаго и Суздальскаго, мы же, чтя труды твоя, умиленно вопием ти:
Радуйся, истины Христовы ревностный исповедниче;
Радуйся, от ереси стригольников мужественный защитниче.
Радуйся, иноческого общежития наставниче;
Радуйся, пасомых овец мудрый начальниче.
Радуйся, слова Божия усердный проповедниче;
Радуйся, правил церковных непреодолимый поборниче.
Радуйся, преподобному Сергию спостниче и собеседниче;
Радуйся, взывающих пред Богом надежный заступниче.
Радуйся, святителю отче Дионисие, земли Российския пресветлое украшение.

КОНДАК 6

Илииною ревностью распалаяся, неправо ходящим противостал еси, никакоже соизволяя недостойного на престол митрополичий поставити и нечестно дати волка в пастыря овцам, благочестно Христа славящим, поющим Ему: Аллилуия!

ИКОС 6

Во град первопрестольный на собор призван был еси и тамо един от всех епископов княжескому повелению противостал еси, честь Митрополии Московския оберегая, противу ставленика князя, возставая и на кафедру первосвятительскую взыти ему возбраняя. Мы же видя ревность твою, взываем ти:
Радуйся, яко древним каноном ревностный исполнитель был еси;
Радуйся, честь бо Митрополии ревностно оберегал еси.
Радуйся, ты же мудростию словес твоих князя обличил еси;
Радуйся, яко мудрования человеча в Церковь не допустил еси.
Радуйся, гнева бо князева не устрашен пребыл еси;
Радуйся, яко един от всех бесстрашно противостал еси.
Радуйся, ты же ревность в послушании церковном показал еси;
Радуйся, худаго бо намерения диавола посрамитель был еси.
Радуйся, святителю отче Дионисие, земли Российския пресветлое украшение.

КОНДАК 7

Днесь восхвалим вси великаго святителя Дионисия и почтим заступника и утверждение земли Российстей, края Суздальскаго хранителя, Пскову и Новаграду от лжеучения оградителя, ереси стригольников ревностнаго искоренителя, и тако возопиим Богу: Аллилуия!

ИКОС 7

Слыша премногую твою добродетель, видя искусна познателя Священных Писаний, и преданиям прилежна исполнителя, посла тя Патриарх Нил быти ереси стригольников искоренителя, мы же дивящеся явленныя в тебе силы Божия, благодарне вопием:
Радуйся, Пскова и Новаграда от лжеучения охранителю;
Радуйся, ереси стригольников неустрашимый искоренителю.
Радуйся, в непрестанных трудах святительских рачителю;
Радуйся, паствы христовыя от ереси добрый хранителю.
Радуйся, нелицеприемный истины ревнителю;
Радуйся, в подвизе учительства неутомимый служителю.
Радуйся, безбожных и нечестивых уст заградителю;
Радуйся, кающихся в лжеименном мудровании наставниче и учителю.
Радуйся, святителю отче Дионисие, земли Российския пресветлое украшение.

КОНДАК 8

Видя Господь твое добродетельное житие, любовь к Писанию и Священному Преданию, апостольскую ревность о Христе, молитвы многия, пост нелицемерный и милостыню всещедрую, любовь к ближним всесовершенную, возвыси тя яко кедр ливанский, мы же славу твою зряще поем Богу: Аллилуия!

ИКОС 8

Видя тя Патриарх града Константина, в Священном Писании прилежна познателя, трудов поста, молитвы и милостыни исполнителя, возложи крещатыя ризы на тя и возведе в сан архиепископский, мы же дивящеся житию твоему умиленно вопием ти:
Радуйся, на скрижалях сердца закон Божий начертавый;
Радуйся, слезами житие свое украсивый.
Радуйся, милостынями Богу угодивый;
Радуйся, пост нелицемерный стяжавый.
Радуйся, молитвы непрестанныя от Бога удостоивыйся;
Радуйся, в Писании Священном искусен познавыйся.
Радуйся, своим бдением ангелом уподобивыйся;
Радуйся, и благая иная от Бога сподобивыйся.
Радуйся, святителю отче Дионисие, земли Российския пресветлое украшение.

КОНДАК 9

Проповедник не словом точию, но и делом явился еси Христова учения, святителю отче Дионисие, яко пастырь добрый, душу твою полагал еси за овцы Христовы и всех с любовию наставлял еси ко спасению, всем образ жития по Бозе подавая и всех поучая взывати присно Богу: Аллилуия!

ИКОС 9

Егда пастырски подвизался еси, святителю Дионисие, о просвещении верою Христовою людий суздальских и нижегородских, благодать Господня излияся во многих делех твоих, приводящи овцы заблудшия к познанию Христову. Мы же, поминая труды и подвиги твоя, зовем ти:
Радуйся, времена и лета достопамятных деяний списати благоволивый;
Радуйся, на писание летописи инока Лаврентия благословивый.
Радуйся, иконы Божия Матери Одигитрии списати наказавый;
Радуйся, ихже в Суздаль и Нижний Новоград доставити повелевый.
Радуйся, кивот со Страсти Христовы с Царяграда принести изволивый;
Радуйся, имиже землю нижегородскую духовно украсивый.
Радуйся, Малахию Философа для просвещения на Русь направивый;
Радуйся, тьму суемудрия стригольническаго изобличивый.
Радуйся, святителю отче Дионисие, земли Российския пресветлое украшение.

КОНДАК 10

Православныя каноны утверждая, прибыл еси в Царьград со святым Феодором, и тамо всех своими добродетельми удивил еси. Патриархом Нилом Митрополитом Русския земли поставлен был еси и в Киеве многия скорби и заточения претерпел еси. Мы же Бога прославляя, поем Ему. Аллилуия!

ИКОС 10

В Константине граде на Митрополию Российскую поставлен быв, великаго града Киева вскоре достигл еси, и от князя тамо заточение смиренно прием, в темнице святую душу свою честно Господеви предал еси. Мы же к тебе взирающи и тобою просвещаеми, дерзаем глаголати сице:
Радуйся, яко тя Патриарх Нил Митрополитом на Русь постави;
Радуйся, яко же сана первосвятительского удостоился еси.
Радуйся, от князя бо заточение претерпел еси;
Радуйся, ты же вся скорби яко от Бога приял еси.
Радуйся, яко мирно и радостно час смертный сретил еси;
Радуйся, душу бо твою во смирении предал еси.
Радуйся, яко же в пещере великаго Антония погребен был еси;
Радуйся, ты же и по смерти твоей нас не оставил еси.
Радуйся, святителю отче Дионисие, земли Российския пресветлое украшение.

КОНДАК 11

Благодать от Бога стяжавшаго, дивного во святых Дионисия почтим сердцем и усты: кто исчислит твои труды, молитвы и посты, о святителю? Мы же потщимся тебе всемерно подражати и благоприятно Богу вопияти: Аллилуия!

ИКОС 11

Светоподательными лучи блистает житие твое, святителю отче Дионисие, евангельския заветы исполняя, крест на раменех своих за Христом безропотно понесл еси, темже и глаголем ти:
Радуйся, Пресвятыя Троицы верный служителю;
Радуйся, Матери Божия усердный почитателю.
Радуйся, ангелов Божиих сослужителю;
Радуйся, пророков святых ревнователю.
Радуйся, апостолов Господних подражателю;
Радуйся, мучеников Христовых соревнователю.
Радуйся, святителей ревностных равностоятелю;
Радуйся, преподобных отцев сопредстателю.
Радуйся, святителю отче Дионисие, земли Российския пресветлое украшение.

КОНДАК 12

Благодать, данную ти от Бога, ведуще, притекаем к твоему заступлению, святителю отче Дионисие, усердно моляще тя. Не остави нас, чад твоих, в святых твоих молитвах, да и мы по скончании нашего земнаго жительства с тобою воспоем Богу: Аллилуия!

ИКОС 12

Светоприемный светильник истиннаго света сущим на земли явля-ешися, святителю Дионисие, просвещаеши бо верных сердца и к разуму Божественному вся наставляеши, поучая и нас радостно взывати тебе:
Радуйся, свеще светозарная, Церковь озаряющая;
Радуйся, звездо землю Российскую просвещяющая.
Радуйся, заре, мрак страстей и грехов разгоняющая;
Радуйся, молние еретичествующих устрашающая.
Радуйся, лучу в иночестве подвизающихся укрепляющий.
Радуйся, свете в подвизех благочестия наставляющий;
Радуйся, светильниче Нижегородский удел просветляющий.
Радуйся, светило Суздальский край освещающее;
Радуйся, святителю отче Дионисие, земли Российския пресветлое украшение.

КОНДАК 13

О предивный и преславный, святителю отче Дионисие, приими от нас недостойных хвалебное пение сие, пролей о нас твоя теплыя молитвы и умоли Человеколюбца Господа, да не погубит нас со беззакониями нашими, но обратит к покаянию и исправлению, да прочее время жития нашего земнаго не в работе греху и страстем, но в делании заповедей Его святых во благочестии провождаем, мы же с тобою вопием Ему: Аллилуия!

МОЛИТВА

О, святителю отче Дионисие, ты веси немощь естества нашего и скорбь времен настоящих, пролей о нас твои теплыя молитвы и умоли Человеколюбца Господа, да не погубит нас со беззакониями нашими, но обратит к покаянию и исправлению, да прочее время жития нашего земнаго не в работе греху и страстем, но в делании заповедей Его святых и во благочестии провождаем. Не презри и не посрами упования нашего, но буди о нас предстатель немолчный к Богу, да сохранит нас от мирских искушений, от диавольских сетей и от плотских похотей, да дарует нам во бранех терпение неослабное. В час же смертный явися нам, отче, заступник необоримый, ускори тогда на молитву о нас, безпомощных, и помози нам мирную и благую кончину улучити, грозныя мытарства воздушныя без препятия минути и в Небесный Горний Иерусалим внити. О, всеблаженне отче наш Дионисие, сподоби ны последовати, по силе нашей, святому твоему житию! Яко да всемилостивым предстательством Преблагословенныя Владычицы нашея Богородицы и Приснодевы Марии и твоими святыми молитвами сподобит нас Преблагий Христос Бог наш наследники быти Царствия Своего Небеснаго, славящих и величающих Его купно со Безначальным Его Отцем, и Пресвятым, и Благим, и Животворящим Его Духом, ныне, и присно, и во веки веков. Аминь.

СВЯТИТЕЛЬ ДИОНИСИЙ, архиепископ Суздальский

Служба иже во святых отца нашего Дионисия, архиепископа Суздальскаго

НА ВЕЛИЦЕЙ ВЕЧЕРНИ

Поем: Блажен муж: 1-й антифон.

На Господи, воззвах: стихиры на 8, глас 5.

Подобен: Радуйся:

Радуйся, Киево-Печерское воспитание,/ собеседниче и спостниче преподобному Сергию./ Радуйся, Нижегородския земли подвижниче,/ преподобных Евфимия и Макария наставниче./ Радуйся, Вознесенския обители начальниче/ и Суздальския земли архипастырю./ Радуйся, о всей земли Российстей за нас теплый молитвенниче/ и пред Богом надежный заступниче,/ радуйся, святителю отче Дионисие.

Радуйся, Киево-Печерския Лавры отрасль духовная,/ смирением, терпением и постом всех удививый./ Радуйся, на брегах Волги обитель чудную основавый/ и храм Вознесения Господня устроивый,/ радуйся, множество иноков собравый/ и начальником от Христа над ними поставленный,/ радуйся, дванадесять иноков на проповедь Евангелия пославый/ и во страны и грады верхние направивый./ Радуйся, святителю отче Дионисие.

Радуйся, святителю отче Дионисие,/ Суздальския страны хранителю,/ радуйся, молящимся крепкое упование/ и христианом мудрый учителю./ Радуйся, Православия ревнителю/ и благочестия хранителю,/ радуйся, ереси стригольников обличителю/ и неустанный в трудах святителю./ Радуйся всем нам заступниче необоримый/ и пред Богом теплый предстателю.

Радуйся, Церкве Православныя светлое украшение/ и Христовых заповедей известный хранителю,/ радуйся, земнаго отечества нашего светлое радование/ и заблуждших к свету богопознания путеводителю./ Радуйся, монахов предивный наставниче/ и мирских человек теплый заступниче./ Радуйся, Суздальскаго удела украшение/ и Нижегородскаго края удобрение./ Радуйся, яко Российския земли светозарное светило явился еси/ и храм Духа Всесвятаго обрелся еси,/ радуйся, предивный иерарше Дионисие.

Радуйся, во епископа Нижняго Новаграда поставленный,/ осиянием добродетелей христианских всеукрашенный,/ радуйся, от ереси стригольников защитниче мужественный/ Церкве и всея земли Российския явивыйся./ Радуйся, иже Божественною ревностию распалаемый,/ разорил еси тьму еретического нечестия./ Радуйся, мудростию словес твоих князя мужески обличивый,/ православныя законы утверждая./ Радуйся, в Константине граде всех своими добродетельми удививый/ и за ревность велию о Господе / митрополитом русския земли поставленный,/ святителю отче наш Дионисие,/ ты же молися о спасении душ наших.

Слава, глас 6:Великия Киево-Печерския Лавры отрасль духовная был еси,/ на реку Волгу с иконой Божией Матери пришел еси/ и на ея брегах, близь Нижняго Новаграда, чудную обитель устроил еси;/ постом, молитвою, слезами весь край сей освятивый/ и множество иноков в ней собравый./ Духовно возрастивый и во ангельский образ посвятивый/ Евфимия преподобнаго и Макария досточуднаго,/ с ними же молися, святителю отче Дионисие,/ даровати нам велию милость.

И ныне, Богородичен: Кто Тебе не ублажит:

Вход. Прокимен дне. Чтения три. Притчей чтение (главы 3 и 8);

Притчей чтение (главы 10 и 11); Премудрости Соломони чтение (глава 4).

На стиховне стихиры, глас 1.

Подобен: Небесных чинов: Предивный иерарше Дионисие,/ житием со Христом соединился еси,/ чресла любовию препоясавши,/ смиренных путь познавши,/ светильник веры украсивши/ елеем милосердия и милости./ Тем с мудрыми вшел еси в Небесный Чертог,/ идеже предстоя Владыце Христу,/ молися, да услышим вопль, призывающий в полунощи,/ и вси изыдем готови в сретение Ему.

Стих: Священницы Твои облекутся в правду,/ и преподобнии Твои возрадуются.

В мале был еси верен, преблаженне Дионисие,/ над многими тя постави Господь,/ темже и прославился еси / добродетельнаго жития образом,/ Того законоположениям последуя,/ яко истинный делатель винограда Христова явился еси/ и возшел еси в радость Господа твоего,/ Ему же ныне предстоя, молишися о душах наших.

Стих: Блажен муж, бояйся Господа,/ в заповедех Его восхощет зело.

Ревнителю благочестия,/ изрядный делателю винограда Христова,/ Священных Писаний совершенный познателю,/ преданиям прилежный исполнителю,/ ихже приял еси от Христа Бога/ и святых Его апостолов,/ Темже явился светильник Церкве, святителю Дионисие,/ не престай моляся о всех, к твоей помощи прибегающих.

Слава, глас 6:Мирский мятеж оставивши/ и вземши крест, последовал еси Христу,/ преподобных Антония и Феодосия ученик добродетельный явился еси,/ Бога возлюбивый всем сердцем,/ тесным путем шествовал еси,/ любовию Христовою утверждаяся,/ и ныне на свое стадо с Небесе взирающи,/ молися Господеви помиловатися душам нашим.

И ныне, Богородичен: Творец и Избавитель:

Тропарь, глас 8: Православия ревнителю,/ благочестия наставниче,/ ищущим спасения добрый кормчий,/ монашествующих Богодухновенное украшение,/ Богоноснаго Евфимия собеседниче, святителю Дионисие,/ ученьми и добродетельми отечество твое просветил еси,/ не забуди нас, чтущих тя,/ но в мире управи живот наш.

НА УТРЕНИ

На Бог Господь: тропарь святаго, дважды. Слава, и ныне, Богородичен.

По 1-й стихологии седален, глас 8: Равноангельно во обители Печерстей пожил еси,/ преподобных отцев Антония и Феодосия житию последовав,/ и обитель яко град, на горах поволжских основал еси,/ в нейже множество иноков собрав,/ образ им для подражания явился еси./ Ныне же предстоя Престолу Владыки всех, преподобне Дионисие,/ испроси мир мирови, стране Российстей утверждение/ и спасение душам нашим.

Слава, и ныне, Богородичен: Дево Всенепорочная, Пресущественнаго Бога рождшая человеком,/ со преподобным Того непрестанно моли о нас,/ согрешений оставление и жития исправление нам прежде конца даровати,/ верою поющим Тя по долгу, Едина Всепетая.

По 2-й стихологии седален, глас 4:На земли, яко Ангел, с плотию пожил еси,/ святителю Христов Дионисие,/ добродетельным житием украсився,/ молитвою с Богом соединився,/ бдением от напастей врага сохранився,/ трудами милосердия весь освятився и над страстьми воцарився,/ темже пришедше ко Владыке Христу,/ моли верно чтущим тя грехов оставление даровати/ и велию милость подати.

Слава, и ныне, Богородичен: Божественная была еси сень Слова, Едина Пречистая Дево,/ чистотою Ангелы превосходящая,/ мене, паче всех персть бывшаго, осквернена плотскими прегрешении,/ очисти Твоими молитвами,/ Божественными водами омывающи и подающи, Чистая, велию милость.

По полеилеи седален, глас 1: Яко звездка днесь пресветла, святителю отче Дионисие, от Киева Великаго возсиял еси/ и Церковь Божию своими добродетелями украсил еси,/ сердца просвещающи всех к твоему заступлению притекающих;/ души верою и любоию тя песнословящих никогда в своих молитвах не оставляеши;/ страстей и козней диавольских свобождаеши всех чествующих святую память твою. Слава, и ныне, Богородичен: Яко всем скорбящим истинное утешение/ и заблуждшим от истиннаго пути правое наставление/ предстани скоро нам, Пречистая Богородительница,/ и люте обидимых от напастей избави./ Вся бо можеши, елико хощеши/, имущи дерзновение к Сыну Своему и Богу./ Егоже умоли Матерними Своими молитвами,/ согрешением прощение даровати/ благочестномудренно почитающим Рождество Твое.

Таже степенна, 1-й антифон 4-го гласа.

Прокимен: Честна пред Господем,/ смерть преподобных Его. Стих: Что воздам Господеви о всех, яже воздаде ми? Всякое дыхание: Евангелие от Иоанна, зачало 35, от полу.

По 50-м псалме стихира, глас 6: Приидите, множество людей благочествых/ днесь богомудраго святителя Дионисия песньми и пении восхвалим/ и честную его икону любезно облобызаим, глаголюще:/ радуйся, преславный святителю Дионисие, отче наш,/ граду Суздалю и Нижегородской земле хранителю,/ радуйся, яко благочестия столп и поборник истины в земли Российстей явился еси;/ радуйся, яко Святей Троице предстоиши со Ангелы,/ Юже моли непрестанно/ даровати душам нашим велию милость.

Канон Богородице со ирмосом на 6, таже святителя, на 8, глас 8

Песнь 1

Ирмос: Воду прошед, яко сушу,/ и египетскаго зла избежав,/ израильтянин вопияше:/ Избавителю и Богу нашему поим.

Отверзи ми устне благодатию Твоею, Христе,/ мрак души моея отгнав, и озари ум мой, молюся,/ яко да возмогу чистым сердцем пети Твоего угодника, преподобного Дионисия.

Приидите, вернии чада, днесь,/ церковнаго светильника и столпа непоколебима,/ Православия учителя и благочестия ревнителя,/ истины проповедника и нечестия искоренителя,/ блаженного Дионисия песньми доброхвальными воспоим.

Киево-Печерския Лавры отрасль духоносная был еси,/ смирением, терпением и постом велию милость у Бога стяжал еси,/ тако испроси и нам у Владыки Христа/ терпение, смирение и душам нашим надежду о спасении.

Богатыя и светоносныя благодати исполнен,/ в обители Печерстей иночествовал еси/ и тамо, яко безплотен, к добродетелем приведе свой ум,/ отче чудне Дионисие.

Богородичен: Яко Истинный Свет от ложесн Своих явившая миру,/ нас во тме страстей ходящих просвети и настави на путь,/ Путь порождшая роду христианскому,/ Марие Богоневесто.

Песнь 3

Ирмос: Небеснаго круга Верхотворче, Господи,/ и Церкве Зиждителю,/ Ты мене утверди в любви Твоей,/ желаний краю, верных утверждение,/ Едине Человеколюбче.

Отечество духовное твое, Киев, оставил еси,/ и Нижняго Новаграда вскоре дошед,/ в нем чудную обитель создал еси/ и собрал множество иноков, царский путь спасения им показуя,/ тако и нас не забуди, и управи к небесным обителям, чтущих святую память твою.

Новую Печерскую обитель на крутых брегах Волги устроил еси,/ из неяже всю нижегородскую землю/ подвигами поста, молитвы и обильныя милостыни украсил еси./ Дионисие, отче священнейший,/ молися Христу Богу о спасении душ наших.

Начальником от Христа в обители Печерстей поставлен был еси,/ собеседник и спостник преподобному Сергию явился еси./ С ним же у Христа Бога испроси нам здравие и спасение,/ и душам нашим велию милость.

Времена и лета достопамятных деяний описати,/ труды и подвиги простаго люда писанию предати/ ты, отче Дионисие, иноку Лаврентию благословил еси,/ тем на рать духовную народ собрати,/ страну и веру нашу от безбожных и чужеверных нахождений сохранити.

Богородичен: Солнце Правды, Истинный Бог наш, плоть приял от Тебе, миру возсиял есть, Марие Дево,/ и тля многобожия погибе до конца./ Светом Сына Твоего, Дево Марие, унынием мя омраченного просвети/ и настави на путь спасения.

Седален, глас 8:Из Лавры Киево-Печерския пришед,/ иконою Пресвятыя Богородицы весь край Нижегородский освятил еси./ Обитель Вознесенскую на горах Волги устроивый/ и в ней подвигами просиявый,/ оттудуже на Суздальскую кафедру поставлен был еси./ Святителю премудре Дионисие,/ моли Христа Бога,/ грехов оставление даровати/ почитающим любовию всечестную память твою.

Слава, и ныне, Богородичен, глас 3: Не от Ангел, не от человек,/ но от Сына Твоего, Владычице, Творца Ангелов и человеков,/ кроткаго и смиреннаго сердцем Иисуса,/ смирению удобь навыкнути могу и не прилежу:/ увы мне! Горд сый, презорлив и непокорив присно от нерадения моего явлюся./ Тя убо, о Дево Пренепорочная, молю сокрушенно с теплыми слезами,/ еже дух кротости и смирения сердцу моему даровати,/ да вкусит покой сладчайший душа моя.

Песнь 4

Ирмос: Услышах, Господи,/ смотрения Твоего таинство,/ разумех дела Твоя/ и прославих Твое Божество.

Икону Богоматери Одигитрии во освящение,/ покров и ограждение земли Русстей из Царяграда принесл еси./ И та источник исцелений и чудотворений всем с верою к ней притекающим показует и от всяких напастей щит державен являет./ Ты же, святителю, непрестанно молися, да покрыет Дева Пречистая Своим омофором всех, к Ней притекающих.

Во епископа Нижняго Новаграда поставленный/ и сиянием добродетелей христианских всеукрашенный,/ мужественный защитник Церкве и земли Российския от ереси стригольников явился еси,/ святителю отче наш Дионисие,/ молися Христу Богу спастися душам нашим.

Тако просветися житие твое пред человеки,/ яко видевше добродетели твоя, отче,/ избраша тя на престол архиерейский града Суздаля,/ емуже дивный архипастырь был еси,/ Пастыреначальнику приводя своя овцы, Иисусу Человеколюбцу.

Помыслив злая, агарянин злочестивый, стрелу лукавую пустив,/ тебе, святителю, сгубити восхотев и веру русскую попрати,/ но ты, Богом сохраняемый и Материею Его Пречистой,/ цел и невредим пребыл еси.

Богородичен: Поющих Ти, радуйся, избавльшая варварскаго служения, изми ны работы чуждаго/ и, сокрушив в мыслех идолострастие, насади благоразумие страха Божия./ Ты бо еси всему благу Вина, Начаток и Исполнение.

Песнь 5

Ирмос: Просвети нас повелении Твоими, Господи,/ и мышцею Твоею высокою/ Твой мир подаждь нам,/ Человеколюбче.

Храм Духа Всесвятаго явился еси,/ предивный иерарше, отче наш Дионисие,/ Нижний Новаград непрестанными молитвами и священнодействием твоим облагоухал еси./ Темже и ныне ходатайством твоим, святе,/ душевныя и телесныя болезни наша исцели/ и всепрощение грехов нам у Бога испроси.

Благочестия столп непоколебимый явился еси,/ святителю отче наш Дионисие,/ светом добродетелей твоих осиявый Суздальский удел./ Ныне же в селениих праведных водворяяся,/ молися о нас ко Господу, да спасет души наша.

Яко велико облистал еси солнце, от славнаго Суздаля/ зарею словес твоих и чудес сияние испущая во всю Русскую землю,/ Дионисие отче, святителю Божий,/ и вся освящая, благочестно тя ублажающия.

Пастырь воистину добрый словесному стаду твоему, святителю Дионисие, был еси,/ душу свою за овцы своя положити готовый./ Темже и явился еси обидимым заступник непреоборимый, правды же ревнитель неустрашимый,/ сильных мира сего с любовию обличая и пасомых своих отечески вразумляя,/ заблудшия же на путь правый, премудре, наставляя.

Богородичен: Вси роди блажат Тя, Марие Царице,/ и мы песньми блажаще, изображенному на иконе лицу Твоему покланяемся,/ праздник светел во памяти святителя Твоего празднующе.

Песнь 6

Ирмос: Молитву пролию ко Господу/ и Тому возвещу печали моя,/ яко зол душа моя исполнися,/ и живот мой аду приближися,/ и молюся, яко Иона:/ от тли, Боже, возведи мя.

Восхвалим вси великаго святителя Дионисия,/ почтим заступника и утверждение земли Российстей и края Суздальскаго хранителя,/ ереси стригольников ревностнаго искоренителя,/ худаго намерения княжеского непреклоннаго обличителя/ и тако возопиим:/ несть свят, якоже Бог наш,/ и несть праведен паче Тебе, Господи.

Во град первопрестольный на собор призван был еси,/ един от всех епископов княжескому повелению противоста,/ честь Митрополии Московския оберегая,/ противу ставленика князя восстая,/ злощастному Митяю на кафедру первосвятительскую взыти возбраняя,/ ныне же молися о нас ко Господу, помиловатися душам нашим.

Ты неправо ходящим противостал еси, преподобне,/ никакоже соизволяя без благословения Вселенскаго Константина града Патриарха произвести на престол митрополита/ и нечестно дати волка в пастыря овцам, благочестно Христа славящим.

Сугубым рвением о благочестии распалаемь,/ спешно прибыл еси в Царьград,/ пред Патриархом Нилом намерение архимандрита Михаила обличая/ и Русь от ереси стригольников оберегая./ Темже мы твое рачение о Православии воспеваем,/ славя Господа во веки.

Богородичен: Свирепеющия во мне страсти укроти/ и ярем смирения возложи на мя, Богородице,/ да под игом его поработаю прочее время/ и обрящу милость в День Судный.

Кондак, глас 8:Звезду Российскую, от Киева возсиявшую,/ чрез Нижний Новград в Суждаль достигшую/ и всю страну сию учением озарившую,/ ублажим Богомудраго Дионисия,/ той бо молится Господу/ спастися душам нашим.

Икос: Обитель Духа Святаго ты, святителю отче Дионисие, показася,/ в трудах, слезах, молитве и посте/ ради Бога подвизася, Ему Единому служа./ Тебя за ревность ко благочестию Господь на кафедру избра,/ постави Суздальския земли архипастырем,/ мы же тебе велегласно тако возопиим: Радуйся, Киево-Печерское воспитание, собеседниче и спостниче преподобному Сергию./ Радуйся на брегах Волги обитель честную основавый и в ней храм Вознесения Господня устроивый./ Радуйся, множество иноков в обители сей собравый,/ над ними начальником от Христа поставленный./ Радуйся, монашескаго жития светлый образе, преподобных Евфимия и Макария наставниче./ Радуйся, от ереси стригольников Церкви и всея земли Российския крепкий защитниче./ Радуйся, в Константине граде всех своими добродетельми удививый/ и за ревность велию о Господе, митрополитом русския земли поставленный./ Радуйся, святителю отче наш Дионисие, земли Российстей пресветлое украшение.

Песнь 7

Ирмос: От Иудеи дошедше отроцы,/ в Вавилоне иногда/ верою Троическою пламень пещный попраша, поюще:/ отцев Боже, благословен еси.

Крепостью Господней измлада укрепляемый,/ в ограде преподобных Киево-Печерских отцев пребывал еси,/ в посте, слезах, молитве свой иноческий путь провождал еси;/ на брег реки Волги с иконою Божией Матери/ Благодатию Духа Святаго направляемый/ обитель чудную основал еси./ Не забуди нас, верою и любовию чтущих тя, преподобне.

Слава святителем и верным людем заступник воистину был еси,/ стране нашей ныне на враги испроси победы и одоление/ и во благочестии утверди ны непоколебимы,/ отче досточудне Дионисие.

Чистое житие свое скончал еси,/ Чистыя Девы Богородицы воистинну служитель был еси/ и святитель Богови истинен,/ ревнитель Православия и священныя веры,/ и стена людем избранным, Богоблаженне Дионисие.

В пещи искушений и в пламени страстей/ егда тебе неопалившагося виде Вселенский Константина града Патриарх,/ ублажи мужество твое и ревность о Православии/ и почти тя саном архиепископским./ Тако и мы, чтуще память твою, превозносим Господа во веки.

Богородичен: Скорая в бедах Помощнице,/ готовое обуреваемым Пристанище,/ сохрани мя, Мати Божия, от потопления житейскаго/ и не даждь ми разбитися о камень пагубы душевныя.

Песнь 8

Ирмос: Царя Небеснаго,/ Егоже поют вои Ангельстии,/ хвалите и превозносите во вся веки.

Празднует Церковь твое преставление и благознаменитый день твоего успения:/ житие бо на земли благочестно пожив, преславне,/ плод сторичествующий Владыце твоему принесл еси/ и от Него сподобился еси славы неизреченныя,/ непрестанно вопия:/ благословен Бог отец наших.

Крепкаго подвижника огнь страстей не опали,/ но Божественная благодать ороси/ и светла житием показа, зовуща:/ благословен Бог отец наших.

Не на песце суеты мирския,/ но на камени веры основание положив, блаженне,/ в честь Вознесения Господня обитель создал еси/ и духовныя твоя чада звати научил еси:/ благословен Бог отец наших.

Послушанием и милосердием, постом же и молитвою Богу благоугодил еси:/ сего ради прослави тя пред Ангелы и человеки/ благословенный Бог отец наших.

Богородичен: Многое веселие творю злыми делы бесом и радость, хранителю же моему печаль отовсюду./ О Чистая Марие, Мати Христа Бога, настави мя на покаяние,/ да будет онем плач, Ангелу же моему радость, и мне с ним во веки.

Песнь 9

Ирмос: Воистинну Богородицу/ Тя исповедуем,/ спасеннии Тобою, Дево Чистая,/ с Бесплотными лики Тя величающе.

Благославного града Суздаля архипастырю благоговейнейший явился еси,/ в Цареграде Патриархом Нилом на Митрополию Российскую поставлен был еси./ Не престай моляся о пастве твоей,/ память твою, достохвальне, совершающей.

В Константине граде на Митрополию Российскую поставлен быв,/ великаго града Киева вскоре достигл еси,/ от князя тамо заточение смиренно прияв,/ в темнице святую душу свою честно Господеви предал еси/ и в пещере великаго Антония погребен был еси./ Ныне же молися со преподобными о нас ко Господу,/ спастися душам нашим.

Святителю Божий, угодниче Христов, Дионисие,/ милости неистощимое сокровище, река милосердия воистину,/ призри на немощи моя и исцели душу,/ страстьми зле обуреваемую,/ уврачуй и тело мое, немощьми обложенное,/ да прославлю в тебе благодать и милосердие Христа Бога нашего.

Приими хвалу от раб твоих недостойных, святителю отче Дионисие,/ не презри приносимое тебе благохваление/ и молитву о нас ко Всеблагому Богу сотвори,/ любовию со благоговением почитающих святую память твою.

Богородичен: Вся тварь песнословит Тя, Дево,/ яко прошедшую вся Небесная врата и ставшую Огнезрачнаго одесную Престола./ Одесную стати и нас сподоби Сына Твоего,/ яко песньми Рождшагося из Тебе и Тя величаем.

Светилен, глас 1:Ученьми твоими и делы Церковь Христову украсил еси, святителю отче Дионисие,/ отонудуже в мире просия твое добродетельное житие:/ в молитвах, и пощениих, и бдениих образ учеником был еси./ Темже вопием:/ слава Давшему ти крепость,/ слава Венчавшему тя,/ слава Дарующему Тобою всем исцеление.

Слава, и ныне, Богородичен:Царя веков, Царице Сущая и Мати,/ умоли над страстьми царей показати певцы Твоя:/ се бо приводим Ти в молитву чуднаго Дионисия, угодника Твоего,/ в егоже памяти покланяющеся Тебе величаем.

На хвалитех стихиры на 4, глас 8:Что тя наречем, Богоблаженне Дионисие?/ Божественных преданий учителя,/ служителя таин и делателя винограда Христова,/ свещу, Церковь озаряющую,/ зарю, мрак страстей разгоняющую./ Российстей земли звезду пресветлую,/ Суздальскаго края светозарное светило./ Многа ти имена и больша дарования,/ темже моли спастися душам нашим.

Восхвалим тя, преблаженне Дионисие,/ Троицы чистое жилище,/ Христу подражателю неустанный,/ пролитие дарований духовных,/ безстрастия красный сосуде и чудес источниче неиссякаемый,/ демонов прогонителю неустрашимый/ и страстей целителю преизрядный,/ монашествующих столпе непоколебимый,/ в трудех святителю неусыпный/ и к Богу молитвенниче непостыдный./ Ныне, предстоя Престолу Владыки всех,/ испроси стране нашей утверждение/ и спасение душам нашим.

Труды, пощением и бдением умерщвляя тело твое/, непрестанными молитвами к Богу всегда вопиял еси,/ Святому Духу прекрасная обитель явился еси,/ Иже видя твое благое произволение,/ архипастырем края Нижегородского и земли Суздальския постави тя./ Ты же Церковь добротами украсил еси,/ люди твоя просветил еси./ Сего ради тя почитаем, святителю Богомудре Дионисие,/ моли о творящих святую память твою.

Слава, глас 2: Киими псалмами и пениями/ ублажим Богомудраго Дионисия?/ Евангельскаго учения рачителя/ и страстем Христовым подражателя,/ святителем украшение, иноком утверждение,/ печальным утешение, отчаянным заступника,/ похвалу и радование земли нашея./ Моли за ны Христа Бога, преблаженне Дионисие,/ да не посечет ны, яко безплодную смоковницу,/ но да вселит ны, идеже свет лица Его.

И ныне, Богородичен, глас 2: Спаси от бед рабы твоя, Богородице Дево,/ яко вси по Бозе к Тебе прибегаем,/ яко к нерушимей стене и предстательству.

Славословие великое. И отпуст.

НА ЛИТУРГИИ

Блаженны от канона, песни 3-я и 6-я. Прокимен: Уста моя возглаголют премудрость,/ и поучение сердца моего разум. Стих: Услышите сия, вси языцы: Апостол ко Евреем, зачало 335. Аллилуия, глас 2: Уста праведнаго поучатся премудрости: Стих: Закон Бога его в сердце его: Евангелие от Луки, зачало 24. Причастен: В память вечную будет праведник:

7 марта, в пятницу, состоялось освящение закладки часовни в честь святого благоверного великого князя Александра Невского, строительство которой начато в Екатерининском парке. Чин освящения закладки часовни совершил архиепископ Орехово-Зуевский Алексий в сослужении благочинного Сретенского округа протоиерея Олега Клемышева и настоятеля Подворья игумена Дионисия, при пении мужского хора Подворья. На молебне молились директор Екатерининского парка с сотрудниками и рабочими, а также сотрудники и прихожане Подворья.

После освящения закладки часовни владыка Алексий сказал теплое и проникновенное слово о необходимости любви к земному Отечеству как дару Божию. О том, что в земле нашей лежат мощами многие святые и, тем самым, освящают ее, что Святая Русь еще жива и будет жить, даже если сожмется до малых размеров. О том, что необходимо помнить и молиться о тех, кто свои жизни положил ради своего Отечества, ради своих детей. И в память о воинах погибших на полях сражений и об усопших ветеранах строится эта часовня. О том, что если наше общество не станет жить по нравственным евангельским критериям, то его ждет катастрофа...

В ответном слове директор Екатерининского парка Симаков Михаил Нилович поблагодарил владыку Алексия за освящение закладки часовни и преподанное благословение и пообещал, что к концу года строительство часовни будет окончено. Инициаторами строительства часовни явились мэр города Москвы Юрий Михайлович Лужков и Совет ветеранов Вооруженных Сил РФ. 

Адрес парка: г. Москва, Суворовская пл., д. 2, метро «Новослободская», «Проспект мира»

28 февраля 2008 года в здании Митромоличьих палат состоялось заседание Попечительского совета Троице-Сергиевой Лавры. Заседание предварил молебен преподобному Сергию Радонежскому, который отслужил Преосвященнейший Наместник епископ Сергиево-Посадский Феогност в домовой церкви Митрополичьих палат. В храме молились Ректор МДАиС архиепископ Верейский Евгений, братия Троице-Сергиевой Лавры и многочисленные спонсоры и попечители.

24 февраля 2008 года, в Неделю о блудном сыне, в храме Живоначальной Троицы Московского подворья Свято-Троицкой Сергиевой Лавры Божественную литургию совершил епископ Саратовский и Вольский Лонгин в сослужении настоятеля игумена Дионисия и братии Подворья. За богослужением пел мужской хор Подворья под управлением регента Владимира Горбика.

К зиме 2007-08 года был завершен ремонт помещения для отдела тканей и облачений магазина "Троицкая книга"

24 февраля 2008 года, в воскресенье, в лекционном зале Митрополичьих палат состоялся концерт "ПЕСНОПЕНИЯ ПРОЩЕННОГО ВОСКРЕСЕНЬЯ" мужского профессионального хора под управлением регента Владимира Горбика

В домовом храме Митрополичьих палат начато восстановление росписей

Банковские реквизиты Подворья

25 февраля 2008 года, в день празднования Иверской иконы Божией Матери и святителя Алексия, митрополита Московского, в восстанавливающейся домовой церкви Митрополичьих палат отслужен молебен Божией Матери и святителю Алексию с водосвятием. Реставрируемый домовый храм предполагается двупрестольным: один престол в честь Иверской иконы Божией Матери, другой - в честь Первосвятителей Московских.

Историческая справка: ...В 1873-1874 годах, на средства благотворителя с восточной стороны к домовой церкви Митрополичьих палат, имевшей один придел, посвященный преподобному Сергию Радонежскому, добавляется двухэтажная пристройка. Нижний ярус ее приспосабливают под жилье, а верхний становится вторым приделом храма. 17 сентября 1875 года он освящается в честь Иверской иконы Божией Матери.

Сказание об Иверской иконе Божией Матери

Житие святителя Алексия, митрополита Московского

18 февраля 2008 года в нашем храме Живоначальной Троицы состоялось отпевание Народного артиста России, актера Московского театра драмы и комедии на Таганке Бориса Хмельницкого. Чин отпевания совершил Настоятель Подворья игумен Дионисий. В храме, у гроба покойного молились его родственники и коллеги.

2/15 февраля Церковь совершает празднование Сретения Господня. В нашем храме накануне вечером было совершено Всенощное бдение, а утром, в день праздника, ранняя и поздняя Божественные литургии. Возглавлял богослужение настоятель Подворья игумен Дионисий. Как обычно, богослужение украсил своим молитвенным пением мужской хор под управлением Владимира Горбика. В храме за богослужением молились прихожане.

Библиотека Московского Подворья Свято-Троицкой Сергиевой Лавры

Становление библиотеки Подворья началось практически одновременно с возобновлением богослужебной деятельности Московского Подворья в конце 1993 года.

Первоначально основу ее книжного фонда составили книги братии Свято-Троицкой Сергиевой лавры, трудников, а также пожертвований первых прихожан храма Живоначальной Троицы. Это был небольшой фонд, который уже к 1995 году составлял около 3500 экземпляров книг и журналов.

К этому времени была закончена основная работа по инвентаризации и упорядочению книжных фондов. Стало ясно, каким количеством книг и какими изданиями необходимо пополнять библиотеку. Но начался и другой этап становления — более сложный. Нужно было определиться, с какой классификацией предстоит работать, какой порядок расстановки книг предпочесть. Был изучен опыт библиотеки Московской Православной Духовной Академии, Синодальной библиотеки Московской Патриархии, некоторых монастырских и приходских библиотек. Выбран был метод такой расстановки, который удобен для братии Подворья и читателей — прихожан храма. Это предметно-тематическая расстановка с открытым доступом к книжным фондам. Такая организация значительно облегчает поиск книг. Каждый приходящий в библиотеку, может самостоятельно выбрать книгу или воспользоваться рекомендациями и советами насельников Подворья и заказать ее у библиотекаря.

В настоящее время библиотека Московского Подворья Свято-Троицкой Сергиевой Лавры — это полноценная православная приходская библиотека.

Книжные фонды насчитывают около 18 тыс. экземпляров, в библиотеке представлено свыше 70 названий духовно-просветительских журналов и газет, активно используется двухтысячный фонд аудио- и видеоматериалов.

В библиотеке сформирован достаточно большой фонд детской литературы, которая необходима для успешной работы Воскресной школы. В фондах библиотеки собираются также все книги, которые выпускает издательство Московского Подворья Свято-Троицкой Сергиевой Лавры. Настоящей сокровищницей библиотеки является небольшая коллекция старинных книг, дореволюционных изданий, которые всегда являются украшением книжных выставок, организуемых библиотекой.

В настоящее время книжные фонды библиотеки формируются с учетом все возрастающего интереса к православной литературе. Это связано и с изучением церковного наследия, развитием богословской науки, духовного возрождения, всеми теми трудами, которые так необходимы сейчас для нашей Церкви.

Просветительская работа библиотеки осуществляется в различных направлениях. Прежде всего, это организация книжных выставок по церковной тематике ко многим мероприятиям, которые проводит Московское Подворье Свято-Троицкой Сергиевой Лавры, как то: Филаретовские вечера и лектории для взрослых.

Особое внимание библиотека уделяет Воскресной школе: сотрудники подбирают книги к занятиям, ведут активную работу с детьми и их родителями - также читателями библиотеки. В их распоряжении книги по вопросам воспитания, по психологии детского возраста и познавательное чтение.

Информационная работа осуществляется путем создания электронного каталога книг библиотеки. В настоящее время в электронной базе данных отражаются все новые поступления, а также книги по библеистике, апологетике, истории Церкви, житийной литературе, религиоведению. Не обойдены вниманием и те читатели, которые интересуются книгами по литургике, философии, истории и духовно-нравственным чтением.

Адрес библиотеки: 2-й Троицкий переулок, дом 6

Часы работы: Суббота 14:30 – 16:30

                       Воскресенье 12:00 – 15:00

Библиотека начнет работать с 27 сентября - по субботам

Для записи в библиотеку необходимо предъявить ксерокопию паспорта